साहित्य

कविता : सर्प, मान्छे र भगवान

भदौ २७, २०७७

    तिमी गाई पालिरहेछौ,
    ऊ सर्प पालिरहेछ,

    तिमीलाई एक मुठा घाँस दिएर 
    उसले एक पाथी दूध लैजानेछ।

    यता तिम्रा बच्चाहरु भोकभोकै मर्नेछन्,
    उता सर्पहरु मोटाउने छन्।
    तिमी उसलाई दूध दिलाउँदैछौ ,
    उसले तिमीलाई विष पिलाउनेछ।

    तिम्रो भगवानले तिमीलाई सिध्याउने छ,
    किन कि, तिमी रहर पालिरहेछौ,
    ऊ सर्प पालिरहेछ।

    तिमी जबसम्म शान्त छौ, ठीक छौ।
    तिमी जब चलमलाउन थाल्छौ, 
    उसले  तिमीकहाँ सर्प पठाउने छ।
    तिम्रो श्रम-पसिना चुसिरहने छ।
    तिमी नतमस्तक रैती झैँ सहिरहने छौ।
    ऊ तिम्रा सन्ततिलाई पनि यसरी नै सताउने छ।
    तिम्रो भगवानले तिमीलाई सिध्याउने छ।

    तिमी रगत बगाएर वीर बनिरहेछौ, 
    ऊ तिम्रो रगत पिएर अमर बनिरहेछ,
    तिम्रा झुप्राहरू उजाडेर महल बनाइरहेछ।
    तिमी भोक र तिर्खाले तड्पिरहँदा,
    तिम्रो भाग खोसेर आफ्नो जिउ पोसिरहेछ,
    तिमी गुजारा जुटाउने  चक्करमा परदेश भासिरहँदा, 
    ऊ साँपहरुलाई आहारा जुटाइरहेछ।

    जब तिमी आफ्नो न्यायको निम्ति
    आवाज उठाउनेछौ, 
    ऊ तिम्रो हातमा बन्दुक थमाउनेछ,
    अनि आफ्नै भाइबन्धुहरूसँग लडाउने छ।
    तिम्रो भगवानले तिमीलाई सिध्याउने छ।

    हे प्राणीजनहरु! तिमीहरु किन यस्तो गरिरहेछौ?
    आफ्नो कर्म आफैंले  किन बर्बाद पारिरहेछौ?
    कति निदाउँछौ ? कहिले जाग्छौ?
    तिम्रा भगवानसँग उसले बाँडेका 
    ठूला ठूला सपनाहरुको 
    हिसाब कहिले माग्छौ?
    ऊ त राहतको नाममा केबल एउटा बोरा पठाउनेवाला छ, 
    तिम्रो रेखदेख गर्न एउटा सर्प खटाउने छ,
    अनि तिम्रो अबोध समर्पणको फाइदा उठाउने छ,
    तिम्रो भगवानले तिमीलाई सिध्याउने छ।

    जाग ! जाग ! जाग ! हे जनहरु !! जाग !
    भाग ! भाग ! भाग ! भजनबाट भाग !
    नत्र...
    तिम्रो भगवानले तिमीलाई सिध्याउनेछ।

तपाईको प्रतिक्रिया दिनुहोस्

यहाँको इमेललाई गोप्य राखिनेछ । अनिवार्य रुपमा दिनुपर्ने जानकारीहरुलाई ' * ' चिन्ह प्रयोग गरिएको छ ।

सामाजिक संजाल

सम्पर्क

थाहा खबर प्रा. लि.
सुमार्गी बी कम्प्लेक्स
बबरमहल- ११, काठमाडौं, नेपाल

इमेलः
समाचार विभाग: इमेल-thahakhabar16@gmail.com
फोन : ९७७-१- ४२६१९४१
बिज्ञापनः फोन- ९७७-१-४२६३४५४
९८५१०७६३३६(सञ्जय नेपाल)
इमेल: mkt.thahakhabar@gmail.com

हाम्रो बारेमा

प्रधान सम्पादक: तीर्थ कोइराला
सूचना विभाग दर्ता नं.: ७७८/२०७४-७५

[विस्तृत]